ភ្នំពេញ៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានត្រលប់មកដល់មាតុភូមិវិញដោយសុវត្ថិភាពនៅរសៀលថ្ងៃពុធនេះ បន្ទាប់ពីបញ្ចប់បេសកម្ម ៣ប្រទេសរួមមានសហរដ្ឋអារិក ប្រទេសគុយបា និងប្រទេសជប៉ុន ដែលមានចំងាយរាប់ម៉ឺនគីឡូម៉ែត្រ។

នៅរសៀលថ្ងៃពុធ ទី២៨ ខែកញ្ញា ឆ្នាំ២០២២នេះ នាយករដ្ឋមន្រ្តីសម្ដេចតេជោ ហ៊ុន សែន បានអញ្ជើញមកដល់មាតុប្រទេសវិញ ក្រោយចាកចេញពីព្រលានយន្តហោះទីក្រុងតូក្យូ នៅព្រឹកថ្ងៃទី២៨ ខែកញ្ញា ឆ្នាំ២០២២នេះ (ម៉ោងនៅជប៉ុន)។

គួរឱ្យដឹងថា គិតចាប់ពីថ្ងៃទី២១ ដល់ថ្ងៃទី២៨ ខែកញ្ញា ឆ្នាំ២០២២ នាយករដ្ឋមន្ត្រីសម្ដេចតេជោ ហ៊ុន សែន បានធ្វើដំណើរទៅបំពេញទស្សនៈកិច្ច ក្នុងប្រទេសចំនួន៣ ដូចជា សហរដ្ឋអាមេរិក ប្រទេសគុយបា និងជប៉ុន។

គួរបញ្ជាក់ថា កាលពីថ្ងៃទី២១ ដល់ទី២៣ ខែកញ្ញា ឆ្នាំ២០២២ សម្ដេចតេជោនាយករដ្ឋមន្រ្តី ហ៊ុន សែន បានអញ្ជើញចូលរួមសម័យប្រជុំលើកទី៧៧ នៃកិច្ចពិភាក្សាទូទៅរបស់មហាសន្និបាតអង្គការសហប្រជាជាតិ (មសអសប) ក្រោមប្រធានបទ «ចំណុចរបត់សំខាន់នៃការផ្លាស់ប្ដូរមិនអាចត្រឡប់ក្រោយបាន៖ ដំណោះស្រាយបរិវត្តកម្មចំពោះបញ្ហាប្រឈមប្រទាក់ក្រឡាគ្នា» ដែលបានប្រព្រឹត្តទៅ នៅទីក្រុងញូវយ៉ក។

ជាមួយគ្នានោះ សម្ដេចតេជោនាយករដ្ឋមន្រ្តី ហ៊ុន សែន បានចាកចេញពីញ៉ូវយ៉ក ដើម្បីឆ្ពោះទៅកាន់ប្រទេសគុយបា កាលពីថ្ងៃទី២៣ ខែកញ្ញា ដែលមានរយៈពេលហោះហេីរជាង៣ម៉ោង ដើម្បីធ្វើទស្សន:កិច្ចសារជាថ្មីម្តងទៀតក្នុងគោលបំណងពង្រឹងចំណងមិត្តភាពដែលមានស្រាប់ឱ្យកាន់តែរឹងមាំថែមទៀតបន្ទាប់ពីទស្សនៈកិច្ចចុងក្រោយរបស់សម្ដេចទៅកាន់គុយបាក្នុងឆ្នាំ២០០០។

យ៉ាងណាមិញ កាលពីថ្ងៃទី២៦ ខែកញ្ញា នាយករដ្ឋមន្ត្រីកម្ពុជា សម្តេចតេជោ ហ៊ុន សែន បានធ្វើដំណើរទៅកាន់ទីក្រុងតូក្យូ ប្រទេសជប៉ុន ដោយសម្ដេចបានស្នាក់នៅទីនោះអស់រយៈពេល ២យប់ ដើម្បីចូលរួមពិធីបុណ្យសពអតីតនាយករដ្ឋមន្ត្រីជប៉ុនលោក ស៊ិនហ្សូ អាបេ និងការមានជំនួបពិភាក្សាជាមួយនឹងនាយករដ្ឋមន្ត្រីជប៉ុនលោក គីស៊ីដា ហ្វូមីអូ ផងដែរ៕